Candidate’s Forum Para sa mga Nagapadalagan nga Kongresista sa Guimaras, Nangin Mainit Matapos Ginsabat sang mga Kandidato ang mga Isyu Kontra sa Ila
Guimaras–Mainit apang matalunsay nga natapos ang Candidate’s Forum sang Aksyon Radyo Iloilo kag UP sa Halalan 2016 para sa nagapadalagan nga kongresista sa Guimaras kaina sang hapon.
Nagtambung sa forum sanday Dr. Lucille Nava kag Vice Governor Vicente de Asis samtang absent si Henry Babiera nga nagrason sang isyu sa iya seguridad. Nag-abot man sa covered gym sang buenavista ang mga supporters sang duha ka kandidato kag iban pa nga luyag magpamati sa mga plataporma sang mga ini kag magsabat sa mga isyu batuk sa ila.
Sa iya opening statement, ginpabutyag ni Dr. Nava nga iduso ang mga programa para sa pagpasanyog sang Guimaras kag tutukan ang lain-lain nga strength sang kada banwa. Ginpromisa sini nga mapatindog sang mas maayo nga mga taytay, karsada, puerto kag wharfs kag pagpa-ayo sang level 3 water system, power supply kag komunikasyon.
Ginpabugal naman ni Vice Governor de Asis nga competent siya agud mangin masunod nga congressman bangud siya abogado kag madugay na nga nagaserbisyo sa publiko. Ginpabutyag man ni de Asis nga nadaug niya ang mga kaso nga nakabenepisyo sa probinsya pareho sang mga kaso kontra sa coast guard may kaangtanan sa pagbiyahe sang mga pumpboats kon gab-i kag kon may storm signal kag ang pagamit sang life jacket sa biyahe. Dugang sini, isa siya sa mga nagadepensa agud indi madayon ang 11 pesos nga terminal fee nga isukot sa mga guimarasnon kon mangin operational na ang Guimaras Iloilo Ferry Terminal. Ginaduso man sini ang Guimaras Economic Zone Authority nga makapanubo suno sa iya sa sukot sa kuryente sa probinsya.
‘Issues’
Ginsabat Nava kag de Asis ang lain-lain nga isyu nga ginhaboy sang mga panelists kag mga nagtambung sa Candidate’s Forum.
Pareho nga ginpaboran nanday Nava kag de Asis ang pagduso sang anti-dynasty bill kon mapilian sa pwesto bisan pa naghabuyanay sang sugilanon nga may himata sila nga nagapadalagan man sa eleksyon. Ginduso man ni Nava ang pagboto base sa konsensya kag wala sang batunon nga kwarta. Pero ginpabutyag ni de Asis nga may nagasugid sa iya nga may mga lideres sa kabaranggayan nga nadala sa 15-30 nga payroll gani ginabaton na lang nila pero maboto gihapon base sa ila konsensya.
Sa isyu naman sang illegal nga druga, dapat suno kay Nava nga dugangan ang pondo sang PDEA agud mas mangin epektibu sila. Ginpabugal pa sini nga isa ang iya bana nga si Congressman JC Rahman Nava nga nagdepensa sa pondo sang PDEA sa kongreso. Para naman kay de Asis, dapat amendaran ang anti-drugs law agud madakpan man ang mga drug lords kag indi lang ang magagmay nga user kag pusher. (Aine Grace Bravo)