UPDATE: Timbang nga Gin-alegar Nagpatay sa iya Duha ka mga Alaga sa Dingle, Ginpakasaan na sang Kaso

Iloilo City — Gin- custody  na sang Department of Social Welfare and Development Office ukon DSWDO  sa Dingle ang timbang  nga ginpahayag may kahilabtanan sa pagpatay sa duha ka mga kabataan sang pamilya Latosa sa Barangay San Matias, Dingle.

Ginpasaka na ang kaso nga double  murder case sa Provincial Prosecutors Office batuk sa timbang nga si alyas Charity-17 anyus sang  Dumaguete, Negros Oriental.

Mabaskog ang ebedensya suno kay Inspector Marvin Buenavista, hepe sang Dingle Police Station nga may kahilabtanan si alyas Charity sa krimen.

Ginbasehan ni Buenavista ang pahayag sang magulang sang mga biktima nga nakit-an si alyas Charity nga dugoon ang kamot kag bayo, natabo ang insedente sa kwarto nga iya gina tulogan, kag siya man lang ang naga uyat sang llabe sa bodega nga ginatago-an sang bara.

Patay ang 11 anyus nga si Ryan kag 9 anyus nga si Boy nga may mga hanog sa ulo kag pilas sang pagka buno sa tiyan.

Ginpahayag nga ginbuno kag ginlamposan sang bara  ang mga biktima.

Magluwas kay alyas Charity, ginpasakaan man sang kaso si alyas Allan nga una gintumod sang timbang nga amo ang nagpatay sa mga bata.

Ginpasakaan sang kaso si alyas Allan suno kay Buenavista, base sa pahayag sang medicolegal officer nga mahimo duha ka mga tawo ang nagpatay sa mga kabataan. (Nemesio Martirez)