UPDATE: Management sang Holland Water, Wala Pa Nakabaton sang Sulat Halin sa Syudad nga Nagapabalo nga Ginbawi ang Kontrata sa Water Delivery

Iloilo City–Wala sang may nabaton nga sulat halin sa City government ang Holland Water Refilling Station nga nagapabalo sang pagbawi sa ila kontrata para magrasyon sang tubig sa mga barangay nga apektado sang El Niño.

Suno kay Joan Pamplona, operation’s manager sang Holland Water, sugod sang ginpabalo ni Atty. Mark Piad, spokesman ni Mayor Jed Patrick Mabilog, sa interview nga ginrekomendar sini ang pag-rescind sang kontrata, wala gid sang may nag-abot nga sulat sa ila tubtub kahapon sang hapon. Nagatudlu-anay sanday Piad kay City Legal Officer Atty. Dan Dinopol ang paghimo kag pagpadala sang sulat.

Abril 20 sang gin-award sa Holland Water ang kontrata apang tubtub subong wala sang may nabaton nga delivery receipt kag logbook si Atty. Piad. (Aine Grace Bravo)