Lalaki nga nakasakay sa Motorsiklo, Gintiro patay sa Sulod sang Karinderya sa Buntatala Jaro

Iloilo City — Napuhag ang mga nagatrabaho kag nagakaun sa karinderya sa Buntatala Jaro matapos nga gintiro patay ang lalaki nga nakasakay sa motorsiklo.

Suno sa cashier sang Rose eatery, nakibot sila sang nabatian nga may naglupok kag nakita ang biktima nga natumba sa kilid sang karsada.

Nakadalagan pa suno sa iya ang biktima nga nakilala kay Lowell Bawe, 46 anyos sang Veterans Village, City Proper pero tumandok sang Agcuyawan Calsada, Barotac Nuevo, kag nakasulod sa eatery pero ginsundan sang gunman kag gin-finishing.

May igo si Bawe sa wala kag tuo nga portion sang dughan, wala nga guya,  tuo nga paa, tuo nga siko kag wala nga parte sang hawak.

Madasig nga nagpalagyo ang mga suspek pagkatapos sang krimen.

Ginlaragway ang gunman nga nakasuksok sang helmet, shade, itom nga jacket kag jersey shorts nga duag green. (JoMaque)