Incoming PNP Chief Ronald “Bato” Dela Rosa, Todo na ang Preparasyon para sa iya Bag-o nga Posisyon

Iloilo City — Todo na ang preparasyon ni incoming PNP Chief Ronald “Bato” Dela Rosa sa iya bag-o nga posisyon.

Una gid suno kay Dela Rosa, ginatutukan niya ang pag-jogging, pagboksing kag pagkadto sa gym agud mapabaskug ang lawas sa pag-atubang sa iya bag-o nga responsibilidad.

Naglahug ini nga hangkaton sang boksing ang mga pulis nga involved sa illegal drugs kag kriminalidad.

Pero seryoso sini nga ginhambal nga kasuhan ang gintumod nga mga pulis kag sipaon sa serbisyo kag kon magbato, dapat nga patyon.

Nagpromisa naman si Dela Rosa nga sundon ang mandu ni President-elect Rodrigo Duterte nga dulaon kon indi man mahagan-hagan ang kriminalidad lakip na ang illegal drugs sa sulod sang tatlo tubtob anum ka bulan sang iya pagpungko.

Nagpabutyag naman sang kahanda si Dela Rosa nga panginmatyan ang mga maayo nga pulis pero disiplinahon sini ang mga pasaway bilang amay sang PNP.

“Humlad-palad Cops”

Madamo nga pulis sa Western Visayas ilabe na sa Iloilo ang nagabaton sang kwarta halin sa mga drug lords.

Gin-ako ini nga problema ni incoming PNP chief Ronald Dela Rosa sa hanay sang kapulisan sa rehiyon.

Panghangkat suno kay Dela Rosa ang pagpahalin sa serbisyo sang mga pulis nga protektor sang illegal drugs kag kon paano mapa-isog ang mga pulis nga nahadluk na magbato sa mga sindikato bangud sa posible kulang nga liderato.

Nagapati si Dela Rosa nga madamo pa nga pulis ang matarung kag nagpromisa nga suportahan niya ang mga ini kon magpangisog sa kampanya kontra illegal drugs.

Nagpa-aman man si Dela Rosa nga dapat makakas man sa serbisyo ang mga katapo sang PDEA nga nagabaton sang kwarta halin sa drug lords.

Ginlaygayan naman ni Dela Rosa ang mga police officials nga nahadlok mag-away sa drug lords sa Western Visayas nga maghalin ukon mag-resign bangud madamo siya sang kilala nga mas maisog kag handa magbato sa sindikato. (JoMaque)