55 ka Pulis sang Iloilo City Police Station nga Naga-operate Kontra sa Illegal Drugs, Gulpi nga Ginpa-Drug Test sang Bag-o nga ICPO Director

Iloilo City–Ginsorpresa sang drug test ang 55 ka personnel sang Anti-Illegal Drugs Special Operations Task Group sang Iloilo City Police Office.

Suno kay PINSP Shella Mae Sangrines, PIO sang ICPO, tuyo sang bag-o nga director sang ICPO-PSSUPT Remus Zacharias Canieso nga madula ang pagpangduha-duha sang pumuluyo sa kridibilidad sang mga pulis nga nagapanguna sa kampanya kontra illegal nga druga. Ginpatawag sa command conference ni Canieso ang mga personnel apang ginsirado ang pwertahan kag ginpa-idalum ang mga ini sa drug test.

Ginpabantayan pa ni PSSUPT Canieso sa SWAT team ang pwertahan agud wala sang makalusot nga pulis sa drug test. Ginpangunahan ni Canieso ang drug test agud ipakita nga dapat matinlo kag wala sang dagta ang liderato sa panugod sang mas mabaskug nga kampanya kontra sa makahalalit nga druga. (Aine Grace Bravo)