Committee of the Whole sang City Council, Naka-establisar sa Inquiry nga Wala sang Water Delivery sa Kabaranggayan ang Ginkontrata sang Syudad nga Holland Water Refilling Station

Iloilo City–Na-establisar sang Committee of the Whole sang City Council nga wala sang delivery sang potable water ang Holland Water Refilling Station sa mga barangay nga apektado sang el niño.

Sa committee hearing kahapon, ginpamatud-an sang pila ka mga punong barangay nga wala nakakadtu kag nakarasyon sang tubig sa ila lugar ang Holland Water. Suno kay Councilor Joshua Alim, labi lang nga nagsanga ang isyu sang gindalahig sang Bids and Awards Committee ang Technical Working Group nga amo ang naga-screen sang mga bidders para sa water delivery.

Gin-ako sang BAC nga ang technical working group ang nagadesisyon kag nagarekomendar sa ila. Apang ginpamilit ni Alim nga ang BAC ang nag-award sang kontrata sa Holland Water.

Ini ang rason suno sa konsehal kon ngaa ginpangayuan niya sang mga dokumento ang BAC nga isumiter sa konseho sa sulod sang duha ka adlaw agud mausisa kon paano gin-award sa Holland Water ang kontrata. (Aine Grace Bravo)