Update: Draft sa Iga-file nga Kaso sang Guimaras Provincial Government kontra sa Iloilo City Government kag sa Double Dragon angut sa GIFT, Nahuman na

Iloilo City — Nadihon na sang Guimaras Provincial Government ang reklamo batuk sa Iloilo City Government kag sa Double Dragon Corporation, ang contractor sang kontrobersyal nga Guimaras-Iloilo Ferry Terminal (GIFT) sa Parola area, City Proper.

Ginalauman ni Guimaras Vice Governor-elect John Edward Gando sa hiwaton nga session nga mapangayuan sang authority sa Sangguniang Panlalawigan si Governor Samuel Gumarin.

Maga-sponsor man sang resolution si Gando nga nagapamatok sa Joint Venture Agreement sa tunga sang city government kag sang Double Dragon.

Nasaad sa kasugtanan nga magabayad sang P11 nga terminal fee ang mga magalabay sa GIFT kag ang plano nga pagpasirado sang Parola kag Ortiz Wharves kun mabuksan na ang proyekto.

Iga-file ang kaso suno kay Gando sa Guimaras Regional Trial Court.

Hingagawon sang Guimaras Provincial Government ang pag-file sang reklamo bangud sang natalana nga pagbukas sang GIFT sa Hunyo 23. (JoMaque)