Publiko, Ginlaygayan nga Magdala sang ID kon Maglagaw kon Gab-i!

Iloilo City–Ginlaygayan ni PSINSP Jojo Tabaloc, hepe sang Mandurriao Police Station, ang publiko nga magdala sang ID kon maglagaw kon gab-i.

Pamatuod ini suno kay Tabaloc nga legal na ang edad sang mga naga-inum ukon nagalagaw ilabe na sa Smallville Complex agud nga indi madala sa police station sang mga naga-roving nga kapulisan.      Suno kay Tabaloc, may mga nagalagaw nga pamatan-on nga kon pamangkuton, nagabutig sang ila edad kag wala sang may ginapakita nga ID.

Nagapati si Tabaloc nga madamo nga menor ang nagakadto sa Smallville gani istriktuhon nila ang pag-implementar sang curfew for minors nga ordinansa. Magluwas sini, ginapahanumdom man ni Tabaloc ang security guards sa mga establisemento nga mangin istrikto kag rekisahon ang mga nagasulod nga customer agud wala sang mga pusil ukon iban pa nga hinganiban nga makalusot.

Nagalaum si Tabaloc nga maga-kooperar ang publiko para sa kaayuhan sang mga menor-de-edad kag kalinong kag katawhay sang syudad. (Aine Grace Bravo)