12-anyos nga Dalagita sa Carles, Nagsuicide bangud sa Mabudlay nga Assigments sa Eskuwelahan

Carles, Iloilo — Bangud lang sa mabudlay nga assignments sa eskuwelahan, nagpanginmatay ang 12-anyos nga dalagita sa Carles.

Suno sa iloy nga si Betsy, naghambal sa iya ang Grade 7 nga bata nga si alyas Inday nga nabudlayan ini sa English, Science kag Music nga assignments nga ginhatag sang iya maestra.

Magluwas sini, nagpanugid man si Inday sa iya iloy nga ginakadlawan sang iya mga classmates bangud nabudlayan ini bisan magsulat sang iya ngalan.

Nasapwan kahapon sang aga sang iya amay si Inday nga nagabitay sa ila balay gamit ang nylon cord.

Una nga nagdumdom ang amay nga nagakatulog lang ang iya bata apang natalupangdan sini nga nagapalanggit-om na ang bibig sang dalagita. (JoMaque)