Sara Mayor Ermilita Salcedo, Nag-athag nga wala niya Gin-ayo ang Pag-relieve kay SINSP Asencion Ortizo

Iloilo — Ginpanginwala ni Sara Mayor Ermilita Salcedo nga siya ang nag-ayo kay Iloilo Police Provincial Office Director RoderickAugustus Alba nga i-relieve si Senior Inspector Asencion Ortizo nga hepe sang Sara Police Station.

Pa-athag ni Salcedo, Hulyo 5 pa lang sang nagpadala siya sang sulat kay Alba nga butangan sila sang bag-o nga hepe bangud nagretiro na ang ila hepe nga si Senior Inspector Gilbert Archide.

Tatlo ka pangalan ang ginhatag ni Salcedo nga pilian agud ibutang nga chief of police nga ginalakipan nanday Senior Inspector Herman Celis Jr, Senior Inspector Ronnie Brillo kag Senior Inspector Alejandro Apostol Jr.

Hulyo 7 lang suno kay Mayor Salcedo nag-courtesy call sa iya si Ortizo kag naghambal ini nga temporaryo man lang siya sa police station.

Wala man sang problema kay Salcedo ang performance ni Ortizo.

Nasawayan lang sini sang ginhambalan ni Ortizo sa atubang sang mga empleyado sang munisipyo nga ipa-surrender ang ila mga himata nga involved sa illegal drugs kag indi paghulaton nga matiruhan ang mga ini.

Gin-athag ni Salcedo nga suportado niya ang kampanya sang administrasyon batuk sa illegal drugs pero dapat nga ibutang man sa ensakto nga proseso. (JoMaque)