Bangkay sang Lalaki nga Ginhal-id sa San Joaquin, Nakilala na!

Iloilo — Nakilala na ang bangkay sang lalaki nga nga nasapwan sa Barangay Baybay Poblacion, San Joaquin.

Positibo nga ginkilala sang iya amay ang biktima nga si George Gallaza Jr base sa nakita sini nga mga litrato.

Gin-ako sang amay nga may mga kaso sang pagpangawat kag illegal drugs ang iya anak apang drug user lang ini kag wala nagabaligya sang illegal nga druga.

Pposible suno sa amay nga may atraso ang iya anak gani nga ginpatay.

Suno naman kay Chief Inspector Hilarion Roga, head sang Scene of the Crime Operatives (SOCO), wala sang pilas ang lalaki magluwas gid lamang nga bali ang iya wala nga kamot.

Naputos ang iya ulo, mga kamot kag tiil sang packaging tape.

Mmahimo suno kay Roga nga na-suffocate ukon wala maka ginhawa ang biktima bangud  natabonan ang iya baba.

May duha ka papel nga nakita ang SOCO nga nasuok sa t-shirt sang biktima.

Nasulat sa isa ka papel ang “pusher, akyat bahay, hold-upper ako .. huwag tularan.”

Nasulat naman sa isa ka papel ang “di niyo ko pamarisan, sakit ako sa ulo sang gobyerno , pusher, user, hold-upper, kawatan ako.”

Ginapatihan nga nakaagi preso ang biktima kon basehan ang mga tattoo sa iya likod nga may ngalan nga HGL (Happy Go Lucky) nga isa sa mga gang sang mga priso sa sulod sang presuhan. (JoMaque)