NTC 6: Mga Dapat Tandaan sa Pagtawag sa Hotline 911

Kinahanglan gid nga magpabalo sang iya lokasyon ukon ginahamtangan ang sin-o man nga magpanawag sa 911 hotline agud magpangayo sang bulig.

Ginpa-athag ni NTC 6 Regional Director Engr. Nestor Antonio Monroy nga importante ini agud mahibaluan kun diin ang nagapangayo sang bulig kag para ma-relay gilayon sa unit nga nakasakop sang area agud maresponderan ang nagakinahanglan sang assistance. Suno kay Monroy, ang tawag batunon sang operator sa Manila, i-check sini ang data base kun sin-o ang dapat nga responders kag didto ipasa ang impormasyon.

Gin-athag man ni Monroy nga direkta nga ma-dial ang 911 sa cellphone man ukon landline kag indi na kinahanglan sang asterisks. Regular nga rate ang ipatong sa kada tawag sa 911 hotline kag importante suno sa iya nga may load gid para makatawag sa amo nga hotline number. (AGB)