Mayor Jed Patrick Mabilog, nanginwala nga abyan niya ang ginkilala sang PDEA 6 nga Drug Group Leader

Iloilo City–Ginpanghiwala ni Mayor Jed Patrick Mabilog nga abyan niya si Melvin Odicta alyas Boyet, ang gin-identify sang PDEA 6 nga drug group leader.

Sa press conference kaupod ang mga local kag national media sa City Hall kahapon, gin-athag sang alkade nga ang kaangtanan niya lang kay Odicta amo nga utod niya si Punong Barangay Nene Odicta sang Tanza Esperanza, City Proper.  Suno kay Mabilog, nagakadto siya sa nasambit nga barangay bangud sang iya official function bilang alkalde.

Nagkadto man siya sa balay ni Odicta sang napatay ang iloy sang negosyante agud mag-simpatiya sa pamilya. Paathag sang alkalde, lima lang ka minutos nga nagtiner siya sa balay ni Odicta kag gilayon man nga nagbiya.

Amo man ini ang rason ni Mabilog sa ginatudlo drug personality nga si Barangay Kagawad Jesus “Jing-jing”  Espinosa sang Monica Blumentritt, City Proper kag sa asawa nga si Keith “Dabing” Espinosa.

Obligado siya nga magtambong sa mga espesyal nga okasyon sa duha ka barangay bangud official function niya ini bilang mayor.

Sa pamangkot naman kun ngaa wala pa nadakop sanday Odicta kag Espinosa, ginsabat ni Mabilog nga wala pa sang na-file nga kaso ang PDEA 6 kag PNP. (AGB)