(UPDATE) BADAC Report sang Libertad, Lapuz, Ginpadala na kay SILG Ismael Sueno–Punong Barangay Sumakwel Nava

Iloilo City–Napadala na ni Libertad, Lapuz Punong Barangay Sumakwel Nava ang iya Barangay Anti-Drug Abuse Council ukon BADAC report sa opisina ni SILG Ismael ‘Mike’ Sueno.

Ginkumpirmar ni Kap Nava nga ginpa-agi niya sa LBC ang pagpadala sang BADAC report. Pero may idul-on pa gid nga kopya sa opisina sang tiglikum agud personal nga ma-istampahan nga nabaton ang report.

Una na nga nagbalibad si Nava nga magsumiter sang BADAC report kay Mayor Jed Patrick Mabilog bangud nga nalakip ang alkalde sa ‘narco list’ ni Presidente Rodrigo Duterte.

Nagpasa si Nava kay Sueno kasunod man sang interview sang Aksyon Radyo Iloilo sa tiglikum kon ano ang dapat himuon sang mga barangay kapitan nga nagapang-alang-alang magsumiter sang BADAC report sa local chief executive nga nalawagan ni Duterte nga drug protector. (AGB)