(UPDATE) LTO-6, May Counter-Proposal sa Syudad sa Plano nga Pag-Deputize sa mga Barangay Kapitan

Iloilo City–Nagtanyag sang counter-proposal ang Land Transportation Office ukon LTO 6 sa city government bilang alternatibo sa ginaplano nga pag-deputize sa mga punong barangay nga magpangdakop sang mga naga-obstruct sa dalan nga sakup sang ila barangay.

Ginsuhestyun ni Atty. Gaudioso Geduspan, legal officer sang LTO 6, nga mas maayo nga magtukod na lang sang 15-member special unit nga magalibot kag magpanakup sang mga traffic violators. Suno kay Geduspan, mabudlay mag-monitor kun i-deputize ang mga barangay kapitan bangud madamo pa sang i-comply antes hatagan sang otoridad nga mag-isyu sang temporary operators permit ukon TOP kag kinahanglan pa nila nga magsumiter sang report. Indi man malikawan nga may mahatagan sang pabor ang kapitan kag maubusuhan sini ang deputation sang LTO.

Liwat nga magasapol si Geduspan kanday Councilor R. Leoni Gerochi, City Legal Officer Atty. Lorna Laurea, Liga President kag Ex-Officio Councilor Reyland Hervias kag TMTRO Head Robert Foerster agud i-plastar ang proposal sang ahensya. (AGB)