Bangkay ni Albuera Leyte Mayor Rolando Espinosa, Nadala na sa Punerarya sa Ormoc City suno sa Aksyon Radyo Tacloban

Tacloban City — Nadala na sa punerarya sa Ormoc City ang bangkay ni Albuera Leyte Mayor Rolando Espinosa nga natiruhan sang CIDG operatives nga ginpahayag maserbe kuntani sang search warrant kahapon sang kaagahon.

Suno kay Jimmy Angay-Angay sang Aksyon Radyo Tacloban, gindala naman sa punerarya sa baybay city ang bangkay sang isa pa ka inmate nga si Raul Yap.

Ginpahayag nga may nakuha man nga mga armas sa selda sang duha ka inmates.

Suno kay Aksyon Jimmy base man sa pahayag sang CIDG Leyte, may nakuha sila nga 38 caliber kag isa ka magazine nga may bala sa selda ni Mayor Espinosa samtang nakuha sa selda ni yap ang 45 caliber kag isa ka magazine nga may mga bala.

Ginreport man sang CIDG nga may nakuha sila nga suspected shabu sa selda nanday Espinosa kag Yap.

Si Mayor Espinosa ang una nga nagsungka sadto kay PNP Chief Ronald Dela Rosa kag nalakip man sa narco list ni Presidente Rodrigo Duterte.

Siya ang amay ni kerwin Espinosa, ang ginatudlo drug lord sa Eastern Visayas kag ginpahayag nga ginkuhaan sadto sang drug supplies ni the late PDEA 6 identified drug group leader Melvin Odicta.

 

“Missing hard drive”

Nadula ang hardrive sang CCTV camera sa Baybay City Sub-Provincial Jail sa Leyte sa diin nakadetain si Albuera Leyte Mayor Rolando Espinosa kag isa pa ka inmate nga si Raul Yap kahapon.

Suno kay Jimmy Angay-Angay sang Aksyon Radyo Tacloban, ginapangita pa ang hardrive sang CCTV camera.

Diri lang mahibaluan suno sa iya kon ano gid ang natabu sa sulod sang detention cell antes nga natiruhan kag napatay sang mga pulis sang CIDG Leyte si Mayor Espinosa kag si Yap.

Una na nga ginpahayag sang CIDG Leyte nga maserbe kuntani sila sang search warrants pero nagpalupok si Espinosa.

Ginpahayag nga may nakuha man nga mga pusil sa selda nanday Espinosa kag Yap. (JoMaque)