Tag-iya sang Pusil nga Kapareho ang Serial Number sa Nakuha sa Leyte Sub-Provincial Jail, Nagsurrender sang 45-Caliber Pistol sa CIDG 6

Iloilo City–Nagkadto sa opisina sang CIDG 6 sa Iloilo City si Junie Ferolino Crispo sang San Jose, Antique agud i-surrender ang iya 45-caliber pistol.

Sa Senate investigation sa pagkapatay ni Albuera Mayor Rolando Espinosa, ginhambal sang CIDG 8 nga na-trace nila nga nakapangalan kay Crispo ang isa sa mga narecover nga pusil sa Leyte Sub-Provincial Jail. Sa pag-imbestigar naman sang CIDG 6 sa pagpamuno ni Senior Superintendent Marlon Tayaba, wala sang malain nga record sa police kag sa iya barangay si Crispo.

Ginsaysay ni Crispo nga gin-trade sini ang iya motorsiklo sa pusil agud may pang-self defense siya. Gin-ako naman ni Crispo na expired na ang lisensya sang pusil. Gintago sini ang pusil pero matapos nga naguwa ang iya pangalan, ginpili ni Crispo nga i-surrender ang 45-caliber pistol sa CIDG 6.

Nakibot ini kon paano nga nagpareho ang serial number sang iya pusil sa narecover nga pusil sa selda ni Raul Yap nga napatay man sa raid sang CIDG 8 sa Leyte Sub-Provincial Jail. Ginpanginwala ni Crispo nga kilala niya si Yap. (AGB)