19-anyos nga Estudyante, Nagreklamo nga Ginhimuslan sang iya Landlord sa Arevalo

Iloilo City — Nagreklamo ang 19-anyos nga estudyante nga ginhimuslan ini sang iya landlord sa Arevalo.  Sa complaint sang biktima sa Arevalo Police Station, natabu ang insidente sang Disyembre 12 sang gab-e sang ginhagad siya nga manyapon sang lalaki.

Nagpanyapon ang duha sa Erning’s Manokan kag nagbalik sa syudad sakay sa multicab sang landlord.

Ginpahayag naghapit pa sa ilimnan ang duha kag ginhagad nga mag-inum sang beer ang estudyante tubtub nga naglain ang pamatyag sang biktima.

Sa baylo nga magpauli na ang duha, gindiretso sang landlord sa Moonlight Lodge sa Arevalo ang biktima kag ginpahayag ginhimuslan.

Mga alas 12 y medya sang kaagahon sang Disyembre 13 na nakaguwa ang duha sa lodging house.

Ssuno pa sa reklamo sang biktima, nakabugtaw siya sa sulod sang kuwarto sang lodging house nga hublas na kag yara sa iya tupad ang lalaki.

Disyembre 13 naman sang hapon sang nagreport sa Arevalo Police Station ang estudyante upod sa iya ginikanan.

Sa pagpangusisa sang Aksyon Radyo sa security guard sang Moonlight Lodge, ginsugid sini nga wala siya sang may nabatian nga nagpangayo sang bulig sa Room 14 nga gina-okupar sang estudyante kag sang landlord.

Indi pa kumbinsido si PO2 Amy Girlyn Acevedo sang Women and Children’s Protection Desk sa Arevalo Police Station sa panaysayon sang estudyante tubtub nga indi niya makita ang resulta sang medical examination sang babaye.

Nagpamalibad naman nga maghatag sang statement ang landlord nga nagatrabaho bilang maestro sa isa ka eskuwelahan sa syudad kag nagpabutyag sang kahanda nga atubangon ang iga-file nga kaso batuk sa iya. (JoMaque)