IBP-Iloilo Chapter, Ginakondenar ang Pag-posas kag Pag-aresto sang PDEA operatives kay Atty. Marbehn Lumbo kasunod sang pag-raid sa Balay sang mga Odicta

Iloilo City — Ginakondenar sang Integrated Bar of the Philippines ukon IBP-Iloilo Chapter ang ginhimo sang PDEA operatives nga suno sa ila illegal nga pag-aresto kay Atty. Marbehn Lumbo samtang nagahimo sang iya trabaho nga pagdepensa sa kinamatarong kag propedad sang iya kliyente.

Kasunod ini sang pag-raid sa balay sang mga Odicta sa Malipayon City Proper sang nagligad nga semana sa diin naaresto ang mag-utod nga Darryl Odicta, Michael Odicta kag Melvin Odicta Jr alyas Vin-Vin nga subject sang search warrant.

Sa ginpaguwa nga statement sang IBP-Iloilo chapter paagi sa ila presidente nga si Atty. Maricar Hiballes, indi makatarungan ang ginhimo sang PDEA operatives nga pagposas kag pag-aresto kay Lumbo.

Indi suno sa iya basta lang mabalewala sang IBP-Iloilo ang natabu gani naga-ugyon sila agud pakigbatuan ang rule of law.

Nagpanindugan ang IBP-Iloilo nga wala sang posas ukon anuman nga sahi sang intimidation ang makapugong sa ila nga himoon ang ila trabaho bilang mga abogado kag mga opisyal sang korte.

Wala man sang makapugong sa ila nga depensahan ang konstitusyon kag ipakigbatu ang rule of law base sa ila ginsumpaan. (JoMaque)