Crew sang training ship sang John B. Lacson, patay matapos gintiro; guwardya sang barko, suspek sa krimen!

Iloilo City–Patay na sang nasapwan ang crew sang training ship sang John B. Lacson sa Muelle Loney, City Proper kahapon.

Ginkilala ni PI Jose Barce sang Iloilo City Police Office ang biktima kay Edward Eucare nga ginabanta naga-edad sang 26 tubtob 27-anyos sang Barangay Igang, Nueva Valencia, Guimaras. Suno naman kay Lieutenant Commander Ramil Palabrica, station commander sang Coast Guard-Iloilo Station, gintudlo nga suspek si Edson Pelonia sang Tech-7 Security Agency kag tumandok sang Oton nga nagapabilin nga at-large.

Sa pag-examine sang Scene of the Crime Operatives sa bangkay sang biktima, may pilas siya sang pagkatiro sa dughan, tiyan kag likod kay may pilas man sa ulo apang wala nahibaluan kun anu ang gintunaan.

Ginpahayag nga nakapadala pa sang text message sa kapitan sang barko ang suspetsado kag nagpahibalo nga gintiro niya ang biktima bangud nagtuyo nga patyon siya gani gin-unahan niya.

Padayon ang imbestigasyon sang mga pulis sa natabu. (AGB)