Pulis nga assigned sa Maritime Command sa Bacolod City, pilason matapos natiruhan sa Roxas City

Roxas City — Pilason ang pulis sang natiruhan sa Roxas City kaina sang kaagahon.

Ginkilala ni Supt. Luther Lugo, chief of police sang Roxas City Police Office, ang biktima kay PO1 Elmer John Layog, assigned sa Maritime Command nga nabase sa Bacolod City.

Suno kay Supt. Lugo, nagapauli na sa Sigma, Capiz si PO1 Layog sakay sa motorsiklo sang naghapit ini sa Roxas City kag natripingan sang apat ka mga lalaki nga nakasakay sa tricycle.

Napilasan sa likod malapit sa abaga ang pulis apang nakabalos ini sang tiro kag naigo ang duha ka mga suspetsado.

Isa ang nadakpan sa follow-up operation samtang isa ang nagapabilin nga at large.

Yara na sa estable nga kondisyon si PO1 Layog nga padayon nga ginabulong sa ospital. (JoMaque)