(UPDATE) Tigulang nga babaye nga napatay matapos ginkastigo sang menor-de-edad nga mga suspetsado, nakadtuan na sang iya pamilya

Iloilo City–Nakilala ang matuod nga pangalan sang tigulang nga babaye nga napatay matapos ginkastigo kag ginlampusan sang bato sa Barangay 9, Tigbauan sang weekend.

Gin-identify sang iya bata ang biktima kay Nena Fernandez sang West Habog-Habog, Molo. Una nga naguwa nga pangalan nga Edna Balandres base man sa pagpakilala sang biktima antes siya napatay sa ospital.

Gin-ako ni Renante Fernandez nga nadula ang ila iloy pila ka semana na ang nakaligad. Gintudlo nga nagkastigo kay Fernandez ang tatlo ka menor-de-edad—duha sa ila ang naga-edad 16-anyos kag isa ang 13-anyos.

Ginpapuli ang 13-anyos nga si Renard samtang ginkustodiya sang MSWDO sang Tigbauan sanday alyas Paul kag alyas Ronald. Pursigido ang pamilya Fernandez nga pasakaan sang kaso ang mga suspetsado. (AGB)