Negosyante sang duta sa Estancia, gintiro patay sang riding-in-tandem

Estancia, Iloilo — Patay ang negosyante sang duta sa Barangay Daan Banua, Estancia sang gintiro sang riding-in-tandem pasado alas 11 kaina sang aga.

Ginkilala ang biktima kay Sergio Bañez Jr., 59-anyos nga may duha ka pilas sa ulo.

Nagpakuno-kuno ang mga suspetsado nga mabakal sang duta sa biktima kabangdanan nga gin-updan sila agud tan-awon ang lote.

Suno sa 12-anyos nga si alyas Toto, nakita gid niya kun paano gintiro sang suspect ang iya lolo nga si Sergio samtang nagalakat sa dalan nga nagasunod ang suspetsado.

Makaduha ka beses nga gintiro sa ulo ang biktima kag nagdalagan ang gunman pakadtu sa iya upod nga nakasakay sa motorsiklo.

Away sa duta ang isa sa mga anggulo nga ginasunod sang pamilya Bañez. (JoMaque)