Taxi driver, ginpapreso sang iya pasahero bangud ginpahayag nga arogante

Iloilo City — Ginpapreso ang 60-anyos nga taxi driver matapos ginreklamo sang iya pasahero nga arogante.

Base sa blotter, halin sa North Baluarte, Molo, nagpadul-ong si Andrew Florida, 40-anyos sang Barasan Pototan, sa Tagbak Jaro.

Nag-ayo si Florida nga sa Diversion Road lang maagi pero nagpamilit suno sa iya ang driver nga si Cenon Amada sang Alimodian kag driver sang Arzea taxi nga sa Nabitasan La Paz sila malabay.

Sang natak-an ang driver suno sa pasahero, ginhambalan siya upod ang iya duha ka bata nga upod nga magpangita sang ila salakyan.

Nagpadulog sa Jaro Police Station si Florida kag ginreklamo ang taxi driver.

Ginpanindugan naman ni Amada nga ginsuhestyon niya lang ang pag-agi sa Nabitasan La Paz kag wala man nagpakita sang arogante nga batasan sa pasahero.

Gintawgan sang Aksyon Radyo ang Arzea management pero wala pa sang sabat sa isyu.

Suno naman kay LTFRB 6 legal officer Jose Marie Lamparero, mahimo makafile sang kaso ang pasahero batuk sa operator sang taxi nga hiring an arrogant driver sa ila opisina.

May kinamatarung naman ang driver nga magmandu sang ruta sang taxi suno kay Lamparero. (JoMaque)