Dugang nga pension sang mga SSS pensioners, wala pa sang kasiguraduhan kun san-o mahatag suno kay SSS Western Visayas Division Head Raul Casiano

Iloilo City — Wala pa sang kasiguraduhan kon san-o mahatag ang dugang nga pension sang mga pensioners sang Social Security System ukon SSS.

Suno kay Raul Casiano, division head sang SSS Western Visayas, nagasunod lang sila sa mandu sang top management.

May rekomendasyon ang SSS nga suguran ang paghatag sang isa ka libo ka pesos nga increase sa pension subong nga bulan kag idugang ang isa ka libo ka pesos sa 2019 ukon 2020.

Pero lain man ang panan-awan sang mga economic managers ni Presidente Rodrigo Duterte suno kay Casiano.

Magapakigsapol pa si Duterte sa iya economic team kag lakip sa istoryahan ang kapalaran sang SSS pension hike.

Indi naman magpati si former Bayan Muna Partylist Representative Neri Colmenares, isa sa mga nagduso gid sang hagna agud dugangan ang SSS pension, nga kulang ang pondo sang ahensya agud i-implementar ang tikang.

Ginapamatukan ni Colmenares ang ginaduso sang economic managers ni Duterte nga pasakaan ang contribution sang mga miembro agud indi maubos ang pondo sang SSS. (JoMaque)