60 KA TEAMS, MAPASAKUP SA PARAW RACE SA 45TH PARAW REGATTA

Iloilo City — 60 ka teams ang mapasakup sa Paraw race sang Paraw Regatta 2017 nga highlight subong nga adlaw sa Arevalo.

Ginpasiguro naman ni Iloilo Paraw Regatta Foundation Incorporated Chairman Ronald Raymond Sebastian nga pasanyugon pa ang kahiwatan kag isustiner sa masunod nga tinuig.

Ang 2017 amo ang ika-45 nga Paraw Regatta Festival. Aminado si Sebastian nga daku nga panghangkat ang pondo apang samtang may nagatan-aw sang festival, himuon sang foundation ang tanan agud mapadayon ang kahiwatan.

Ang Paraw Regatta, ginakabig nga oldest sailing event sa Asya. Nagalaum si Sebastian nga suportahan sang tanan nga stakeholders ang festival.

Masobra duha ka milyon ka pesos ang budget sang Paraw Regatta subong nga tuig kag wala pa diri nalakip ang bulig sang mga sponsors.

Naghatag ang city government sang 1.6 million pesos samtang tag-P300,000 naman ang gin-amot sang Department of Tourism 6 kag Iloilo Provincial Government. (JoMaque)