Boarding House Sa Ajuy Ginsulod Kag Ginkawatan

Municipality of Ajuy – Ginsulod kag ginkawatan ang boarding house sa Barangay San Antonio, Ajuy kaina sang kaagahon.

Nabiktima si Babeth Villaflores, 33 anyos nga bookeeper kag administrative officer III sa Ajuy National High School.

Base sa pag-imbestigar sang Ajuy police sa pagpamuno ni Chief Inspector Charlie Sustento,  nakasulod sa boarding ang suspek paagi sa pagtaklas sa terasa. Suno kay Villaflores, ginpukaw siya sang suspek kag gintayaan sang pusil pero nakapalagyo siya kag nakapangayo sang bulig.

Nakuha palagyo sang suspek ang laptop, duha ka cellphones, tablet kag masobra duha ka libo ka pesos nga cash. Ginpalagyo man sang suspek ang 10 mil pesos nga kwarta sa tiangge sang tag-iya sang boardhouse nga si Villa Cruspero.

(Aljohn Torreta)