Job Fair sa May 1

Iloilo City–82 ka mga kompaniya ang magapasakop sa job fair sang Department of Labor and Employment ukon DOLE 6 sa Lunes, Mayo 1, Labor Day sa Atria sa Mandurriao.

Suno kay DOLE Assistant Regional Director Salome Siaton, sa 82 ka mga kompaniya, 60 dire ang local, 10 ang sa business process outsourcing kag 12 ang overseas companies. 17, 778 ka mga trabaho ang nagahulat para sa mga mapalaron nga aplikante.

Magluwas sa trabaho, may livelihood fair man suno kay Siaton ang Department of Trade and Industry nga magabulig naman para sa mga luyag magpangita sang palangabuhian.

Sa Lunes man hatagan sang award ang mga best employees sa pribado nga sektor. Subong nga adlaw, nagsugod man ang DOLE Clinic nga nagatuyo naman magpahangup sa mga pumuluyo sang mga serbisyo nga ginatanyag sang ahensiya. (AGB)