Ilongga kag bugal sang Banate-Atty. Allana Mae Babayen-on, top 4 sa 2016 Bar Exams

Iloilo–Dapat nga magfocus kag indi magpa-distract. Panugyan ini ni Atty. Allana Mae Babayen-on, tumandok sang Barangay Belen, Banate kag graduate sang University of San Agustin, nga nagpang-apat sa 2016 Bar Examinations nga may 88.75% rate.

Gin-ako ni Babayen-on nga may kahadlok siya nga indi makapasar gani tuman ang iya kalipay sang ginpaguwa sang Korte Suprema ang resulta sang bar exam kaina sang aga kag indi lang nga nakapasar siya kundi nakasulod pa sa Top 10. Mabudlay suno kay Babayen-on ang pag-eskwela sa law school pero nagtuon siya sang maayo kag wala gid nagpa-distract samtang naga-review.

Ang pagdominar naman sang mga taga-probinsya sa bar exam nagapamatuod suno sa iya nga wala sang monopoliya sa kina-alam ang mga taga-Manila. Lunsay taga-provincial law schools ang nakasulod sa Top 10 sang bar exam sang nagligad nga tuig.

Ginahalad ni Atty. Babayen-on ang iya kadalag-an sa tanan nga Ilonggo. Si Babayen-on ang nagatrabaho sa Bids and Awards Committee office sang Iloilo Provincial Government. (AGB)