Janiuay Mayor Jojo de Paula, ginreklamo nga nagpalupok sang pusil sa Inland Resort sa Maasin!
Maasin, Iloilo — Ginreklamo nga nagpalupok sang pusil si Janiuay Mayor Jojo de Paula sa inland resort sa Maasin. Suno kay PO2 Efren Berbano sang Maasin Police Station, nag-outing si Mayor De Paula upod sa iya mga basketball players sa Villa Teresita Inland Resort sa Barangay Tubang, Maasin. Pasado alas-11 kagab-i, ginpahayag nga nagpalupok sang makaduha ka beses si Mayor De Paula samtang ara sa iya salakyan. Nadaplisan sa tiyan si Donald Robles, 20-anyos sang Naslo, Maasin kag luwas na sa katalagman. Gin-ayo si mayor sang barangay kagawad kag mga tanod sang Barangay Tubang nga ihatag ang iya pusil pero ginpahayag nga wala siya nagsunod gani ginbululigan agud nga makuha ang pusil. Confine sa St. Paul’s Hospital si Mayor De Paula bangud sang pilas sa ulo. Gina-check pa sang Maasin police kon may papeles ang 9mm nga nakuha sa mayor. Kon wala sang papeles, kasuhan si Mayor suno kay PO2 Berbano.
Tubtub alas 4:30 kaina sang kaagahon, nagakatulog pa si Mayor De Paula. Pero nagpasalig siya suno sa iya nga bodyguard nga mahatag siya sang statement sa natabu kon makabugtaw na. Arestado ang status ni Mayor De Paula. (JoMaque)