PNP Chief Dir. Gen. Ronald Dela Rosa, nagbisita sa Maasin Police Station!

Maasin, Iloilo–Nag-abot sa Iloilo si PNP Chief Director General Ronald Dela Rosa halin sa Bacolod City kaina sang udto.

Ginhatagan si Dela Rosa nga simple nga arrival honors antes siya nagpadulong sa Maasin Police Station nga ginsalakay sang New Peoples Army sang Hunyo 18. Disappointed si Dela Rosa bangud wala gid suno sa iya nakapalupok ang mga pulis kag nadala pa sang NPA ang ila mga armas kag iban nga kagamitan. Suno sa PNP Chief, tsansa na kuntani sang mga pulis nga mapakita ang ila pagserbisyo kag pagka-alerto pero wala natabu.

Naluoy man si Dela Rosa sa mga assigned sa police station sang natabu ang insidente bangud imbestigaran sila kag posible pasakaan sang kaso kon mapamatud-an nga may kakulangan.

Samtang gin-check sini ang sulod kag palibot sang police station kag iya ginpabutyag nga indi ideal ang building bilang police station. Ipa-usisa ni Dela Rosa sa Logistics ang area agud makadesisyon kon patindugan sang bag-o nga police station. (AGB)