Meter reading card ordinance, ginalauman nga ma-implementar na matapos na-publish sa local newspaper

Iloilo City — Iga-implementar na ang meter reading card ordinance nga gin-author ni Councilor Joshua Alim.  Na-publish na suno kay Alim ang ordinansa sa Visayas Journal sang Hulyo 19.  Hulaton ni Alim kon sundon sang Panay Electric Company ang ordinansa matapos nabalitaan nga gina-isa-isa sang ila Corporate Communications Officer nga si Mikel Afzelius ang mga konsehal agud iplastar ang ila mga programa kag ginpahayag ginaduso ang pag-amendar sa ordinansa bisan wala pa na-implementar.   Kon ma-implementar na, magapanguna sa monitoring kon ginasunod sang PECO ang ordinansa ang business permit and licensing office. Pero mahimo suno sa konsehal nga magpabalo sa iya opisina, sa BPLO ukon ang city legal office ang mga konsumedor kon indi magtuman ang PECO. Base sa ordinansa, hatagan ang kompaniya sang anum ka bulan pagkatapos nag-epekto agud maghatag sang meter reading card sa mga konsumedor. Nagapanguna nga katuyuan sang ordinansa suno kay Alim nga malikawan ang sala nga billing bangud makumparar sang konsumedor ang ila previous kag current bill. (JoMaque)