Iloilo 3rd District Cong. Arthur Defensor Jr, nagpaathag sang rason kon ngaa nagboto pabor sa martial law extension sa Mindanao
Iloilo City — Ginpaboran ni Iloilo 3rd District Congressman Arthur Toto Defensor Jr., ang hingyo ni Presidente Rodrigo Duterte nga palawigon ang martial law sa Mindanao tubtob sa Disyembre 31 subong nga tuig. Isa si Defensor sa 261 ka mamalidha nga nagboto sang yes sa extension batuk sa 18 nga nagpamatuk.. Suno sa kongresista, luyag niya mahatagan ang presidente sang kapabilidad agud nga matapos ang rebelyon sa Mindanao. Ginpa-athag ni defensor nga sa iya paghangup, indi lang isa ka pag-atake ang rebelyon pareho sang marawi siege kundi may kasugpon pa kon indi lubos nga mapa-untat.
Mayo 23 sang gindeklarar ni Duterte ang martial law sa Mindanao bangud sa natabu sa Marawi City kag maga-expire ang deklarasyon subong nga adlaw. Apang sa special joint session sang kongreso kahapon, 261 ka mamalidha ang nagpabor sa request ni duterte nga i-extend ang martial law sa Mindanao tubtob sa katapusan sang tuig. Sa 261, 16 ang senador kag 245 naman ang mga kongresista. Nagpamatuk naman ang 14 ka kongresista kag apat ka senador. (JoMaque)