Mga balay ilimnan sa Smallville Complex, ginpamonitor sang ICPO Director

Iloilo City–Ginapa-monitor ni ICPO Director PSSUPT Remus Zacharias Canieso sa Mandurriao police ang mga bars sa Smallville Complex sa Diversion Road nga masami ginaluntaran sang gamu.

Suno kay Canieso, mahimo siya sang special report nga isumiter kay Mayor Jed Patrick Mabilog agud nga ma-review sini pananglitan magpa-renew sang business permit ang mga natungdan nga establisemento. Natalupangdan ni Canieso nga kalabanan sa mga gamu, nagakatabu sa sulod sang mga bars nga indi masakup sang kapulisan.

May responsibilidad suno sa iya ang mga tag-iya sang bars nga proteheran ang seguridad sang mga customers kag establisemento. Dapat mangin istrikto suno kay Canieso ang seguridad agud indi makasulod ang mga menor-de-edad kag mga hinganiban sa mga bars.

Base sa blotter reports nga nakuha sang Aksyon Radyo halin Hunyo tubtob Hulyo subong nga tuig, 22 ka kaso sang pagpangbuno, pagpangtiro kag pagpangastigo nga ginadalahigan sang mga menor-de-edad ang narecord. (AGB)