Mga klase sa Iloilo City, ginkanselar subong nga adlaw bangud sang malain nga panahon

 Iloilo City–Ginkanselar ni Mayor Jed Patrick Mabilog ang klase sa tanan nga level sa pribado kag pampubliko nga eskwelahan sa syudad kaina sang hapon bangud sang malain nga panahon dala sang Bagyo Gorio.

Temprano man nga ginpapuli ang mga empleyado sang city hall. Samtang nagsorry si City Administrator Atty. Hernando Galvez bangud pasado ala-1 na sini napaguwa ang mandu ni Mabilog nga ginrelease pasado alas-11 kaina sang aga. May ginpabilin lang nga skeletal force para sa disaster team sang syudad.

Ginlaygayan naman ni City Disaster Risk Reduction and Management Council Operations Officer Darwin Papa ang publiko nga mag-alerto ilabe na subong nga tig-ululan. Mas maayo suno sa iya nga magbalon sang payong ukon iban pa nga tabon sa lawas kag botas para indi mabudlayan maglabay sa mga dalan nga ginabaha. Nakahanda ang CDRRMC suno kay Papa sa anuman nga sitwasyon. (AGB)