Report nga may grupo nga nagapanglatigo sa mga menor de edad nga nagalagaw kon curfew hours, gina-validate na sang Police Station 1

Iloilo City — Gina-validate sang mga pulis sa Station 1 ang nabaton nga impormasyon nga may grupo sang concerned citizens sa syudad ang nagalibot kag nagapang-latigo sa mga minors nga nagalagaw kon tungan gab-i tubtub kaagahon. Suno kay Police Chief Inspector Aldren Lamera, hepe sang City Proper Police Station, may report siya nga nabaton sang nagligad nga semana nga may mga minors nga ginlagas sang mga tawo nga may dala nga latigo ukon gamay nga lipak. Wala gid ma-identify sang mga minors kon ano nga grupo ang nagapanglagas nga may latigo bangud madasig sila nga nagpalagyo. Nagpanugyan si Lamera sa mga ginikanan nga indi pagpabay-an ang ila nga kabataan agud indi malatigohan. (JoMaque)