(UPDATE) Hepe sang Police Station 1, nagpanindugan nga indi planted ang suspected shabu nga nakuha kay PO1 Domar Deocampo

Iloilo City–Indi planted ang suspected shabu nga narecover kay PO1 Domar Deocampo sa buybust operation sa Tanza Baybay, City Proper sang weekend.

Ini ang depensa ni PCINSP Aldren Lamera, hepe sang Police Station 1, sa akusasyon ni PO1 Deocampo nga ginplanteran siya sang shabu sang kapareho niya nga pulis. Suno kay Lamera, sang nagligad nga tuig pa siya nakabaton sang impormasyon angut sa ginpahayag illegal drug activities sang mga Deocampo sa Tanza Baybay. Ginpahayag ni Lamera nga wala pa siya nagpati sang una nga nabaton ang impormasyon apang panibag-o nga impormasyon ang iya nabaton subong nga tuig nga involved si PO1 Deocampo sa pag-distribute sang illegal nga druga.

Madugay man suno kay Lamera nga gin-monitor nila ang aktibidad sang mga Deocampo tubtub nakumpirmar ang impormasyon sang nadakpan sa buybust operation ang tagabantay sang computer shop sang pulis nga si Jewel Belcar. Ginsugid ni Belcar nga si PO1 Deocampo ang nagahatag sa iya sang items, ang utod sini nga si alyas Nonoy Baboy ang nagakolekta sang kuwarta samtang nagaserbi nga drug protectors ang ila ginikanan nga sanday Punong Barangay Dominador Deocampo kag Barangay Kagawad Marissa Deocampo.

Ginpanginwala ni PO1 Deocampo nga involved siya sa illegal drugs kag gin-akusaran ang nag-operate batuk sa iya nga nagtanum sang mga ebidensya. Ginpahayag man ni Deocampo nga ginhimo nila sadtu sang assigned pa siya sa Molo Police Station ang pagtanum sang shabu. (AGB)