PCI Charlie Sustento nga aktibo sa anti-drugs campaign, gindismiss sang Ombudsman

Iloilo–Gin-dismiss sang Office of the Ombudsman ang police official nga tuman ka aktibo sa kampanya kontra illegal nga druga.

Ang dismissal kay PCI Charlie Sustento, supervisor sang Provincial Drug Enforcement Unit kag Provincial Special Operations Group Team 3 kag hepe sang Ajuy Police Station, nag-ugat sa ginpasaka nga kaso nanday Richard Samontosa kag Janice Braga sang Dumangas batok kay Sustento kag sa kaupod nga mga pulis nga Ssanday PO3 Ramon Baylon, Jr, PO2 Joebert Detorio kag PO1 John P. Dimzon.

Sa reklamo nanday Samontosa kag Braga, ginpahayag nga sang Nobyembre 24, 2014 sang gab-i, gin-imbitar sila ni Sustento nga na-assign sadto sa Dumangas MPS, nga magkadto sa police station may kaangtanan sa nadula nga motorsiklo. Sang nagpamalibad si Samontosa, ginpahayag nga ginsinggitan siya ni Sustento kag ginsumbag. Gintayaan man siya pusil sang upod nga pulis ni Sustento.

Sa bahin ni Braga, ginpahayag sini nga gintayaan man siya sang pusil ni Sustento.

Una na naglapta ang impormasyon nga ang pagdismiss kay Sustento naangut sa pulitika. Pero sa dokumento sang Ombudsman, makita nga guilty ang apat ka pulis sa kaso nga grave misconduct kag conduct unbecoming of a police officer nga ginpasaka nanday Samontosa kag Braga.

‘Daku nga kadulaan’

Gin-ako naman ni PCI Aron Palomo, spokesperson sang Iloilo Police Provincial Office nga daku nga kadulaan sa ila ang pagdismiss kay Sustento. Suno kay Palomo, maka-demoralize sa kapulisan ang natabu kay Sustento.

Nagpamalibad pa nga magpa-interview si Sustento pero ginpahayag ni Palomo nga nabaton na sang hepe ang desisyon kahapon sang hapon. Nagapangita pa suno sa iya si Sustento sang legal remedies sa nangin desisyon sang Ombudsman. (AGB)