Balay ni Iloilo City Mayor Jed Patrick Mabilog, ginbisitahan sang NBI 6

Iloilo City–Ginkadtuan sang mga ahente sang National Bureau of Investigation 6 ang balay ni Mayor Jed Patrick Mabilog sa Barangay Tap-oc, Molo kaina sang hapon.

Ginkonfirmar ni Atty. Mark Piad, spokesman ni Mabilog, nga nag-abot ang apat ka NBI agents kag nagtan-aw sang balay sang alkalde. May pahanugot man suno kay piad halin kay Mabilog ang pagsulod sang taga-NBI sa iya balay.

Ginpahayag ni Piad nga bukas si Mayor Mabilog sa mga ahensya sang gobyerno nga magakadto sa iya balay matapos ang mandu nga lifestyle check ni Presidente Rodrigo Duterte.

Si Mayor Mabilog ang ara sa Japan para sa official travel. May ginhimo naman nga prayer rally for peace ang mga supporters sang alkalde sa atubang sang City Hall kaina sang hapon matapos gin-anunsyar ni Duterte nga i-assign si PCI Jovie Espenido sa Iloilo. (AGB)