Mag-Utod Sa Conception, Iloilo Nagreport Nga Ginhagad Sang Mga Lalaki Nga Magsakay Sa Van

Municipality of Concepcion -Nagreport sa Concepcion Police ang mag-utod nga 11 anyos kag siyam ka tuig nga gin-agda sila sang lima ka lalaki nga magsakay sa van sa Bacjawan Sur, Concepcion samtang nagapauli sang mierkules sang udto.

Apang ginpahayag ni Chief Inspector Abner Jordan, hepe sang Concepcion Police Station, nga indi makabig nga attempted abduction ang natabu bangud wala man ginpilit ang mag-utod upod sa duha pa ka estudyante nga magsakay sa dark-green nga van.

Suno sa mga estudyante, nagalakat sila sang gin-agda nga magsakay. Ginkulbaan ang mga estudyante gani nga nagdalagan samtang ang duha ka mag-utod ang nagreport sa Concepcion police.

Nagpasalig si Jordan nga imbestigaran ang natabu. Nagpanawagan man siya sa mga ginikanan nga idul-ong kag sugaton ang ila kabataan sa eskwelahan agud masiguro nga safe.

Sa record sang mga pulis, lima ka kaso sang attempted nga pagkuha sa mga estudyante ang ginreport-isa sa Tigbauan kag apat sa syudad sang iloilo kag gina-imbestigaran na sang mga otoridad.

(ATT)