High Value Target dug personality nga ginserbihan sang search warrant sa Anilao, nakuhaan sang pusil, granada kag illegal nga druga

Anilao, Iloilo — Ginserbihan sang search warrant ang ginakabig high value target drug personality sa Brgy. Palaypay, Anilao kahapon sang aga.  Narecover sa balay sang subject nga si Raffy Lagamon, ang M16 rifle nga may duha ka magazines, 9mm pistol, caliber .22 revolver, isa ka granada kag 11 ka sachet sang suspected shabu. Arestado man ang upod sa balay ni Lagamon nga si Rommel Sumayo nga nakuhaan sang 9mm pistol.  Suno kay Senior Inspector Jess Baylon, hepe sang Anilao Police Station, madugay na nila gina-monitor nga may pusil si Lagamon gani gin-applyan sang search warrant.  May report man nga masami nagapalupok sang pusil si Lagamon.  Magluwas sini, nakabaton man sang reklamo ang Anilao police nga may ginkastigo nga apat ka tawo sanday Lagamon kag gintayaan sang pusil ang SB member sang banwa. Base sa impormasyon ni Baylon, customs broker si Lagamon kag HVT drug personality sa syudad sang Iloilo. (JoMaque)