Mga transport groups sa Western Visayas, nagaduso sang P3.50 nga dugang sa pletehan

Iloilo City — Ginsuportahan sang Western Visayas Transport Coalition ang tikang sang transport groups sa Manila nga nagpetition sang saka sa pletehan sa depasahero nga mga jeep.  Suno kay Iloilo City Loop Alliance of Jeepney Owners and Drivers Association ukon ICLAJODA president Boyet Parcon, nahisugtan nila sang iban pa nga transport associations sa rehiyon nga magsunod sa petition sang national transport groups nga himuon 10 ka pesos ang plete. Nadesisyunan ini sa sinapol sang Western Visayas Transport Coalition. Ginpa-athag ni Parcon nga sunod-sunod ang pagsaka sa presyo sang gatong, nagmahal man ang presyo sang spare parts sang salakyan kag mahal man ang basic goods gani apektado gid ang kita sang mga drivers kag operators. Nagalaum naman si Parcon nga mahangpan sang publiko ang ila sentimento.  Isumiter sang western visayas transportation coalition sa LTFRB ang ila petition nga dugangan sang tres pesos kag 50 sentimos ang regular fare agud mahimo nga 10 ka pesos. (JoMaque)