2 ka menor-de-edad, nalampusan sa rambol sang mga pamatan-on kag construction workers sa Diversion Road

Iloilo City–Nalampusan sang tubo ang duha ka menor de edad nga lalaki sa rambol sang mga pamatan-on kag construction workers sa atubang sang SM City malapit sa overpass sa Diversion Road, Mandurriao kagab-i.

May hanog sa wala nga guya ang 15-anyos samtang nalampusan man sang tubo sa ulo ang 16-anyos. Suno kay PSI Victor Legaspi sang Mandurriao Police Station, nagsugod ang gamu bangud sa nagakahulog nga debris halin sa gina-construct nga building sa atubang sang mall.

Ginpahayag nga gingarit garit sang mga pamatan-on ang mga construction workers tubtub nga naghabuyanay sang bato.

Suno naman sa 15-anyos nga si alyas Mike, nagabantay lang siya sang salakyan pakadtu kuntani sa iya amay agud magkuha sang allowance sang ginlampusan sang tubo. Ginpanghiwala sini nga sila ang nag-umpisa sang gamu. (AGB)