Imbestigasyon sang IPPO sa pag-abduct sa 22-anyos nga dalaga sa Ajuy, naga-amat amat na sanag

Iloilo — Naga-amat-amat na sanag ang imbestigasyon sang Iloilo Police Provincial Office sa pag-abduct sa 22-anyos nga si alyas Ira sang Central, Ajuy sang Setyembre 18 nga wala gihapon nakapauli tubtob subong.   Suno kay IPPO Director Marlon Tayaba, gina-imbestigaran nila kon sin-o ang nagapanag-iya sang motorsiklo nga narecover kag ginapatihan ginsakyan sang duha ka abductors sang gindala si Ira.  Gina-trace man kon matuod nga ang kapitan sang Zerrudo, Sara nga si Manuel Agutaya ang nagpahulam sang m16 rifle sa mga suspek. Ginraid ang balay ni Agutaya kahapon pero wala nakita ang m16 rifle nga suno sa intelligence information, ginpahulam sini sa abductors. Ginrason sang kapitan nga nadula ang pusil sang naglaslas ang Bagyo Yolanda sang 2013 apang subong nga Setyembre niya lang ginpa-blotter. Nagapabilin naman nga ginasunod nga motibo ang pagpangimon bangud sang ginpahayag relasyon ni Ira sa kasado nga negosyante nga taga-Sara. (JoMaque)