(UPDATE) 19-anyos nga estudyante nga gintuyo i-abduct sa Pavia, nagapati nga natripingan siya sang mga suspek

Iloilo City–Nagapati ang 19-anyos nga estudyante nga babaye nga natripingan siya sang apat ka lalaki kag isa ka babaye nga nagpwersa sa pagpasakay sa iya sa itum nga van sa Ungka II, Pavia kagab-e.

Suno kay alyas Lynlyn, nagabantay siya sang salakyan sa traffic lights sang nagdulog ang van, nanaog ang lalaki kag nagkadto sa iya likod. Dugang niya, sang amat-amat nga nagpalapit ang van sa ila, hinali lang siya gintiklod sang lalaki pasulod sa salakyan.

Suno pa kay Lynlyn, gintayaan siya sang 45 caliber nga pusil, ginpahug patyon, ginbuyayaw kag gintuyo ubahan apang nagbato siya. Ginpatung-an siya sang duha ka lalaki, sa front seat naman nagapungko ang babaye samtang sa likod nagapungko ang isa pa ka lalaki.

Nakaluwas si Lynlyn matapos niya ginsiko ang lalaki sa iya tuo kag ginsipa samtang gintiklod naman ang lalaki sa iya wala tubtob nga nag-untat ang van, nabuksan niya ang puertahan kag nakaguwa siya.

Ginpabutyag ni Lynlyn nga nagpangayo siya sang bulig sa mga nagalabay nga mga salakyan sa Green Meadows Subdivision sa Jaro apang wala sang may nagpondo magluwas lang sa tricycle driver nga nagdul-ong sa iya sa ila balay. (AGB)