(UPDATE) Pamilya sang preso sang Passi City Police Station nga napatay sa kastigo base sa autopsy result, nagpalab-ut sang reklamo sa NAPOLCOM 6

Iloilo City–Nakalab-ot na sa National Police Commission 6 ang reklamo sang pamilya ni Jomar Lorizo, ang preso sa Passi City Police Station nga napatay sa kastigo base sa autopsy result.

Suno kay NAPOLCOM 6 Spokesperson Allen Camiring, nakasugod na sila imbestigar sa amay nga si Raul Lorizo. Gina-process na lang suno sa iya ang mga dokumento pareho sang complaint affidavit agud masuguran ang pre-charge investigation sa kaso.

Kon makita nga substantial evidence, pasakaan sang kaso administratibo nga grave misconduct ang mga pulis nga involved. Posible nga ma-elevate sa summary proceedings ang kaso kon may makita nga probable cause.

Gin-athag ni Camiring nga ma-establisar kun sin-o nga mga pulis ang involved paagi sa duty detail sang Passi City Police Station. Posible man makasuhan ang chief-of-police kon wala ini nag-aksyon pagkatapos sang insidente.

Una na gintudlo sang amay nga mga pulis ang nagkastigo sa iya bata base man sa ginsugid ni Jomar sang gindala siya sa ospital. (AGB)