Duty jailer kag Hepe sang Passi City Police Station, posible maiguan sa kaso nga grave misconduct kasunod sang kamatayon sang preso samtang ara sa ila kustodiya

Iloilo — Posible maigu-an sang kaso nga grave misconduct ang duty jailer kag ang gin-relieve nga hepe sang Passi City Police Station matapos napatay sa ila kustodiya ang detainee nga si Jomar Lorezo.  Ginpa-athag ni National Police Commission ukon NAPOLCOM 6 investigator Jun Combong nga base sa ila Memorandum Circular 2016-002, makabig nga grave misconduct ang pagmaltrato sa na-detain. Pero padalman pa sang NAPOLCOM ang incident report nga ginsumiter kahapon ni Chief Inspector Gerverson Moyo lakip na kon ano ang salabton sang iban nga pulis nga naka-duty sang napatay si Lorezo. Ginahulat man sang NAPOLCOM 6 ang judicial affidavit kag certificate of non-forum shopping sang pamilya Lorezo.

Gindakup sang nagligad nga semana si Lorizo kag iya duha ka pakaisa matapos gintudlo nga nagbuno sa pulis assign sa Passi City Police Station nga nagresponder sa rambol sa convenience store..// Pero gindala sa ospital si Lorizo matapos nagreklamo nga masakit ang tiyan bangud sa pagkastigo sa iya sang iban nga preso..// Base sa pag-autopsy ni PRO 6 medico legal officer Dr. Owen Libaquin, napatay si Lorizo sa sobra nga pagkastigo.

Mga preso ang gintudlo nagsapote

Mga preso ang nagsapote sa detainee sang Passi City Police Station nga si Jomar Lorizo nga napatay sa pagkastigo base sa autopsy result.  Ini ang nabutang sa incident report nga ginsumiter sang hepe nga si Chief Inspector Gervenson Moyo sa National Police Commission 6 kahapon. Suno kay NAPOLCOM 6 investigator Jun Combong, ginpangayuan ni Moyo sang paathag ang walo ka pulis nga nakaduty sang natabu ang pagkastigo kay Lorizo kag nagcorroborate ang ila statement nga ginsapote ini sang pito ka preso. Nabutang sa report nga may lookout ang mga preso gani wala gid sang hinalung-ong ang duty jailer sa ginahimo kay Lorizo.

Base sa pag-autopsy ni Dr. Owen Lebaquin, medico legal officer sang Police Regional Office 6, bali ang gusok, na-damage ang atay, nagdugo ang utok kag tinae kag madamo sang mga lagub sa lawas si Lorizo.  Suno sa amay nga si Raul, nakapanugid pa ang iya bata nga ginpakastigo siya sang mga pulis sa mga preso. Gindakup si Lorizo kag iya duha ka pakaisa matapos na-involved sa rambol sa convenience store sa diin nabun-an ang pulis nga assign sa Passi City Police Station nga nagresponder. (JoMaque)