Iloilo City Police Office, plano magtukod sang composite team agud solusyunan ang mga insidente sang pagpangastigo sa Mandurriao

Iloilo City — Magatukod sang composite team ang Iloilo City Police Office agud matapna kun indi man malikawan ang insidente sang pagpangastigo sa Mandurriao ilabe na sa kabaranggayan nga nagasakop sa Smallville Area. Ini ang tikang ni ICPO acting Director SSUPT Henry Biñas kasunod sang ginpatawag nga sinapol sa mga barangay officials kag mga chief security sang mga business establishments sa Smallville Area, the Atria kag Megaworld angut sa problema sa mga menor kag mga pamatan-on nga nagapanggamo. Suno kay Biñas, ang kooperasyon kag pagbuligay sang police kag barangay tanod upod ang mga barangay officials ang mga paagi agud solbaron ang problema. Kasunod ini ang nagataas nga numero sang pagpangastigo sa Mandurriao ikumparar sa iban nga distrito halin Enero tubtub Oktubre.

Ang composite team pagabug-usan sang police, barangay officials, barangay tanod nga maga-roving sa mga lugar nga masami ginatambayan sang mga menor kag manggamo. Nagpasalig naman sang suporta ang mga opisyales sang Barangay San Rafael, Bolilao, Tabucan, Taft North kag Q. Abeto Mandurriao. (JoMaque)