Calinog Mayor Alex Centena, ginkalipay ang balita ni Gov. Art Defensor nga na-clear na siya sa illegal nga druga

Iloilo — Ginkalipay ni Calinog Mayor Alex Centena ang balita ni Governor Art Defensor nga na-clear na siya sa illegal nga druga. Si Centena ang isa sa mga nalawagan ni Presidente Rodrigo Duterte nga nalakip sa iya narcolist. Pero mas maayo suno kay Centena kun may papel ukon announcement halin sa Malacanang nga nagapahayag nga cleared na ang iya pangalan sa isyu sang druga. Suno kay Centena, tuman ka sakit sang natabu sa iya nga ginhimuan siya sang sala nga wala niya nahimo. Dugang niya, pila man ka tuig nga nagsakripisyo siya kag ang iya pamilya. Si Centena upod sanday Maasin Mayor Mariano Malones, Maasin Vice Mayor Francis Amboy kag Carles Mayor Seigfred Betita ang ginhatagan na sang pahanugot nga magsaylo sa PDP-Laban nga partido ni Duterte. Sa pihak sang maayo nga balita, ginpahayag ni Centena nga posible magpangduha-duha siya nga magsaylo sang partido kun wala siya sang gina-uyatan nga papel nga naga-clear sa iya sa druga.  (JoMaque)